مغامرة ولد الصحرا و الهرْابينو

يا سيدي و  قلنا السلام

حبيت نحكي مغامرة هايلة ياسر أبطالها " ولد الصحرا " و" ولد اللوز " و الإيفاريست ڨالوا ..... لحكاية بدات وقت ما جانا ضيف عزيز لصفاقس السيْد هذا هو ولد الصحرا كلمني قالي هاني جايك  وصل لصفاقس مع الليل و دوب مرتاح و دوْش و صنع جوو قلي فين نشوفك قتلو إيجاني لقهوتي " سيدي بوسعيد " وصل سلمنا على  بعضنا  هبطنا شيشة عالمية فرح بيها ياسر و إعتبرها  شيشة غير عادية خاترها صراحة حاجة ليكس شيشة تدوم أكثر من أربعة ساعات و معسْل طاير ..... بعديكا قلي راني لازم نعمل تحريشة توا  و قلي هيا نمشيو ناكلو حويجة  رغم انو الوقت متأخر ياسر تقريبا نصف الليل مشينا لمطعم شعبي على شارع 7 نوفمبر و خوكم الهرابي هبطلها وحيْد لبلابي بالعظمة و صديقنا الأخر عمللها طابونة سكالوب تعشينا و تصورنا و ضحكنا و نبرْنا  بعديكا  كل واحد مشى لدارو و إتفقنا باش نتقابلو مع الصباح في البلاد العربي ايا الحاصيلو طلع النهار قمت قبلو و قيمتو و مشيت عملت قضية و كلمتو و إتفقنا على القصبة متاع صفاقس  باش تكون ملتقانا أيا الحاصيلو انا قاعد قدام باب القصبة و هو في غربها هو يستنى و انا نستنى و الشمس كلاتني بعديكا قمت نلوْج عليه و لقيتو و سي ولد الصحراء بعد سلامو قلي هرابينو شوفلنا مطعم أكلة خفيفة صراحة قعدت مستغرب ولد الصرا إنسان من أولوياتو الأكل و أهم عضو في جسمو هاكي الكرش الكبيرة إلي عندو قتلو أحنا في السونتر فيل ندخلو للبلاد العربي نعملو تصاور و كذا متاع بحثك بعديكا نهزك لمطعم تحفون متاع قريبي إختصاص سفافد أيا الحاصيلو الوقت ما ضاع  كان بهالتصاور و ماخلينا شيئ مصورناهش بعديكا خرجنا من  باب الجبلي بعد ما دخلنا البلاد العربي من باب الديوان و من غاديكا سي ولد الصحراء يلمحْلك مطعم فيه المواصفات إلي يحبهم هوا و هو بكونو شعبي و يعمل كفتاجي الحاصيلو المطعم مالبرة هلا هلا و مالداخل يعلم الله دخلنالو نشوفو كان في وجوه تعيسة ووجوه فقر و المطعم  فات الشعبي من غادي الحاصيلو الأكلات تثير الإشمئزاز و الناس إلي فيه أكثر و أكثر دخلنا قعدنا على طاولة حقيرة في قمة القذارة بعد ماطلب عمك ولد الصحراء صحيْن كفتاجي و انا سندويتش قلت لعلو أقل سوؤا من بقية المؤكولات ... الحاصيلو ربع ساعة قاعدين و لا حياة لمن تنادي طلبنا و ماجانا شيئ و الشر باش ياكلنا قلت يلا نخرج و نشوف مطعمم ارحم احنا خارجين و هما شدو فينا و حضرلنا ما طلبنا في دقيقتين تقول بالغصب تاكل من عندو الحاصيلو خرجنا مورالنا طايح  كيفاش ناكلو هالماكلة هاذي و الشيئ إلي يحمص أكثر بحذاه مطعم نظيف ماكلتو تشهي و  بنينة برا مشينا بردنا تكيفت سيجارو و بعديكا قلي ولد الصحرا هيا نرجعو نصورو قتلو زهرك باهي مادامك مع ولد الهرابي هيا طلعنا لرباط المدينة من أعلى العمارات الموجودة في الناصرية و صور صفاقس كاملة طلعنا و عملنا تصاور حلويين و بعديكا مشينا عملنا قهوة و ريْحنا فخار ربي و من بعدها مشينا للبانكة باش نصرفو فلوس و من بعدها قتلو لازم نهبطو للسونتر فيل لمقر حزبي قلي اوكي قتلو خوذ تاكسي خير أخطانا مالشموسات الواحد قريب تضربو الشمس قلي هيا نمشيو على ساقينا و بيناتنا ولد الصحراء قرنيطة و شحْة فوق ما تتصوْر هع هع ... خذينا تاكسي مشينا للمقر حكيت معاهم شويا و ريڨلت قضيتي و من بعدها تفاهمت مع ولد الصحراء باش نمشيو لدار الجلولي وسط البلاد العربي مشينا غادي ووصلنا قبل مايسكر بنص ساعة  بعد ما ستنينا العساس و لا شكونو إلي كان يصلي و دخلنا لهذا المعمار الاثري .. صراحت قد ما نوصف و نمدح و شويا فيه .. شنيا إبداع شنيا جمال شنيا ألوان  زاهية شنيا تاريخ شنيا اصالة و الله العظيم تقول جنة و بلاصة ترجع الروح للعبد الحاصيلو عملنا جو و تصاور كالعادة بعديكا خرجنا باش نشريو كعبة وسكي و من بعدها نلوجو على اللبلابي و عكست معانا ملقيناش لبلابي تراصتلنا في كعبات فريكاسي حاصيلو كعبة الفريكاسي صراحة حقيرة جدا فوق ما تتصور شايحة و ماجات شيئ حاشا نعمة ربي و مالإخر أحنا الزوز معدناش زهر في الماكلة و بعديكا خرجنا و عرضنا صدفة " ولد اللوز " و قررنا نهدو على اقرب قهوة و كالعادة الشيشة موجودة و  ظهرلي ولد الصحرا مكبوط عليها خاتر في الخارج مفماش شيشة كيما الموجودة في تونس - رد بالك لا تخمج مخك بركا -  مالعصر للمغرب و أحنا نتحدثو و نتناقشو في مواضيع عديدة و مفريناش بالوقت و بعديكا جاء صديقنا الأخر المعروف ب " الإيفاريست ڨالوا "  ركبنا في كرهبتو و إنطلقنا لنزل سيفاكس باش نعملو كعبات و نحكيو حاصيلو مجمْت نتذكر شيئ وقتها خاطرني بالعو  نوعا ما اما صراحة فما حاجة شدتلي إنتباهي في قعدتنا كافر و ما يشربش الحاصيلو انا بديت نشيخ في مخي و يتعدا بحذايا ليبي فرحان بمريولو إلي فيه علم الثوار و نتعتو بجرذ الناتو خاف مني و فصع بعديكا جانا وحيْد أخر و قعد معانا و تناقشنا في القضية الليبية لين صارت نص الليل و قتها  روحنا و من غدوا يجمعنا لقاء انا و ولد اللوز و ولد الصحرا باش نطلعو للعاصمة تحديدا المنزه في حافلة ديمقراطية تقدمية انا ركبت مع ولد اللوز في حافلة سياحية فاخرة وو لد الصحرا في كار و تتحقق حلمو بأكل كسكروت عمْك و أنا في كار أخرى منطلقة من ساقية الدائر سبق مالإول حتى وصل قبلنا بنص ساعة و هو يستنى الحاصيلو و صلنا للقبة سلْمت على أحبتي و صحابي و إنتشرنا ..... حان الأن موعد الجلسة الخمرية بتوقيت المنزه و ضواحيها و المكان منزل ولد الذوادي مع شلة من المدونين و الزملاء متاعو المهم ضربنالها الوسكي و الباكس و كمية زمبورة و بعدها روحت لصفاقس بعد ما شيعنا شويا ولد الصحرا سلمنا على بعضنا و مشيت و صراحة حسيتو خلا بلاصة كبيرة عليا




الخلاصة عملنا جو و صراحة مقدرتش نتذكر كل شيئ بالتفصيل لأني كتبت هالمدونة بعد 3 أيام مالغامرة و حبيت نعملها ديديكاس لولد الصرا