ما يحصل في صفاقس .... !!

أسفي و حزني كبيران على عاصمة الجنوب ... بالحق شيئ مؤسف كي نشوف صفاقس وصلت للحالة هاذي .... الليبية بأنواعهم ثوار و أتباع القذافي في نزاع و حي;ط صفاقس ما سلمتش منهم و كأنهم يحبو يخرجو صفاقس من الحكم المدني لحكمهم الثوري الغوغائي و ينقلو حربهم اللعينة في هالبلاد ... حيوط صفاقس تمسْخت بشعاراتهم  ........... الحاصل  راس الهم و المشكلة الكبيرة في هالليبية - مرحبا  بيهم مانيش عنصري - اما لازم يحترمو رواحهم تمشي لما يسمى بشارع 7 نوفمبر و لا الناصرية تلقاهم ميرقدوش  غنا و جوهم حافل الحاصيلو و تبزنيس و شراب و انت إفهم وحدك من نص الليل و انت هابط... ... مش كان هذا المشكل المشكل الأخر إلي ضرب التونسي في الصميم هوغلاء الأسعار من جرتْهم و أهمها الضروريات البشرية كيما الخضرة و الغلة و المواد الغذائية عموما ... الأسعارنار يا صاحبي و الزوالي و المحتْحت هو المتضرر و مش كان الماكلة أسعارها نار حتى الموطورات و البساكل مسلمتش منهم و شهدو إرتفاع كبير في أسوامهم.... و الطلعة الجديدة ولاو يبيعو في السلاح للمجرْمة و  أكدلي الشيئ هذا قريبي بوليس  ... بصراحة شيئ مقرف لازم حل و لازم يحترمو رواحهم و يحترمو غيرهم و ما ينساوش بكونهم ضيوف  مش جايين كراية و لاو ملاكة ... و أخبار اخرى من صديقي قالو هاو 500 ليبي رسْم في الناصرية الكبيرة و الصغيرة معناها باش يقراو معانا و أنا صراحة لتوا مستغرب ..... أما مش كان بعض الليبية إلي خاربين صفاقس حتى المجرْمة و إلي هاربين مالحبس خذاو بايهم في النطْرة و السرقة و الفساد و زاد حلالهم الجو كي يلقاو غياب البوليس و الأمن و كأنو الشيئ متعمد مالشرطة و الدليل قداش من عرْكة و خبيلة  قدام عيون البوليسة و هما عاملين وذن عروسة و ماعمبالهم بالطقس و غرضهم الوحيد مش حماية البلاد و توفير الأمن بل مطالبهم ما بعد ه"الثوْرة " الحاصيلو الظروف  صعيبة و الصفاقسي و التونسي عموما  في خطر و نعرف بكونو الشيئ هذا في البلايص الكل و لعل المدن الكبرى إلي صاير فيها من فساد و إجرام أبرك من غيرها  ...... الخلاصة لازم الامن يرجع و يفرض روحو و يحميني و يحميك و لازم الضيْف الليبي ميتجاوزش حدودو و يخلي صراعاتو مع الطرف اليبي الاخر في بلادو مش في بلاد غيرو و لازم البياع يحط أسوام مناسبة و ميستغلش هالحكومة اللاشرعية و يبيع لولد بلادو بأسوام نار و الأهم لاناس تاخو حذرها مالبراكاجات و السرقة و الغشة و النصب و الإحتيال ..... و السلام  
:=)